4

Assalamu Alaykum Warahmatullahi Ta'ala Wabarakatu!

Anak namoh kalasahan,

Bang ako lumaas na, anduh lasaha tuud ako iban hatiha in kaul palangay ko.

Bang ako makabagbag kakaunan atawa maka-asag sabaw ha pag-kaunan sabab sin bukon na masawa in pangitah ko, anduh ayaw mo ako pag-amahi.

Maluhay magpangdahdah in tao malaas na.

Mag-ulong ulong ako ha baran ko sakahabah mo ako pamahitan.

Bang ko dih na kahatihan in bissara mo sabab sin mahinah na in pangdungog ko, anduh ayaw mo ako iyana "BISO!", baliki na sadja in bissara mo atawa sulatan na sadja ha katas.

Hatiha ako anak, maas na tuud ako.

Bang ako dih na makatindug sabab sin mahinah na in tuhud ko, anduh ayaw mo ako pasari, tabangi tuud ako tumindog bya sin pag tabang ko kaymo ha wakto in ikaw hihinduan ko pa tumikang.

Anduh hatiha ako bang ko bukon na makapila pagbalik-balikan in bissara ko

Dungog na sadja kaw. Ayaw kaw magsunglot atawa sumuhon dumungog kakoh, atawa ayaw mo ako pagkatawahi.

Katumtuman mo pa ka anak ha wakto in ikaw batah-batah pa?

Bang awn panayaman kabayaan mo, bukon mo makapila pag-balik-balikan pangayuun kakoh. Dih kaw humundong sahinggah dih mo makah in kabayaan mo. Syabalan ko anak in kakulitan mo...

Anduh Tahani atawa sabali bang ako maghamot na bukon marayaw ha ilong mo.

Bahoh maas na, Bahoh lupah na.
Ayaw mo ako pugusa mamaygoh.
Mahina na in pamaranan ko.
Maluhay na masakit bang makananam haggot.
Anduh ayaw mo ako hipanghilummih.

Katumtuman mo pa ka ha wakto batah-batah pa kaw?
Tumapok kaw pa saum kama, papag-apasun mo ako kaymo bang kaw dih mabayah payguan. Tiyahanan ko in kaul palangay mo anak,

Sabali bang ako daran na magbungis, Maraih biyah na tuud ha ini bang kita lumaas na. Kahatihan mo ra sa yan ako bang kaw mabiyah na sin ummul ko.

Bang awn wakto mo anduh daha ako mag miting-miting misan da kuman daih-daih. Ha bay na hadja ako ini isa-isa sambil kahaponan way mara ko magbissara.

Kiyaiingatan ko sasaw kaw ha hinang mo, sah anduh tiyumtum ko na tuud in pagmiting ta, misan kiyaiingatan ko bukon kaw masub ha mga story ko.

Katumtuman mo pa ka anak ha wakto in ikaw batah-batah pa?
Tiyatasan ko diyungog iban hiyati in pamissarah mo misan kaw magkalluh-kalluh na mag-story kakoh sin hal sin mga panayaman mo.

Bang dumatung na in wakto in ako masakit na, dih na maka ig ha kulangan, anduh ayaw mo ako pasari.
Hatiha tuud ako anak bang dumatung in wakto in ako mag-ihih mag-intawh na ha kulangan. Anduh ayuputa tuud ako iban lasaha, in tumtumun mo in ako dih na maglugay di ha dunya.

Bang dumatung na in adlaw in ako mawafat na, ulini in duwa lima ko,pakusuga in pangatayan ko harapun in kamatay. Anduh tabangi tuud ako mamung sin kalima "LA ILAH HA ILLALLAH, MUHAMMAD RASULULLAH "o
Ayaw kaw masusa anak, sambil pa adlaw akhirat, pangayuun ko pa ALLAH (s.w.t), na bang man kaw kaulungan nya ra, sabab in ikaw makasi malasa mag maas.....

Landoh malasa kaymo....

-Maas Mo-